tumhe mehboob kehta,
palkon pe bithaata,
nazron se sajaata.
baat sirf itni, tum gar maan leti:
tum, tum na hoti.

meethe neem ke narm chaaon mein,
svapn-desh vichraata.
nabh ke taaron se,
zameen ko sajaata, behlaata.
bas ek sirf,
tum, tum na hoti.

lekhniyaan tum par mohabbat ki,
din raat lutaata, dohraata.
mridul ritu ki deewangee jutaakar,
man ki jalti pyaas bujhaata.
ae kaash agar,
tum, tum na hoti.

khamoshiyon ko bikherte,
tumhare saundarya ke raag gaata.
chanchal titli, tere chitt ko,
apne hridaya ka vishaal vyom thamaata.
bas wohi, ae jaanejaan,
tum, tum na hoti.


ho anumati agar,
ek aagrah karoon tumse?
path mile firse, tumse agar,
in tanhaayiyon par taras khaana.
milte rahe kayee mujhse,
is baar tum mil jaana.